کراچی(خلیج نیوز)سندھ میں کچے کے ڈاکووں کو قابو پانا چیلنج بن گیا، درجنوں خطرناک گینگ تاوان کیلیے سوشل میڈیا کا بھرپور استعمال کررہے ہیں۔کندھ کوٹ میں پولیس اور رینجرز کا کچے کے علاقے میں آپریشن جاری ہے۔کچے کے داخلی راستے بند ہیں، فورسز کی فائرنگ سے کچے کے ڈاکووں کے 7 سہولت کار زخمی ہوگئے۔سکھر ڈویژن میں 6 ماہ کے دوران 31 افراد اغوا ہوئے جبکہ 3 ماہ میں ضلع کشمور سے 90 اور شکار پور سے 60 افراد کو اغوا کیا گیا۔ڈاکوئوں سے 126 مغوی آزاد کرالیے گئے ہیں جبکہ 24 مغوی تاحال رہائی کے منتظر ہیں۔

لاہور (خلیج نیوز) پاکستان تحریک انصاف کے مرکزی صدر و سابق وزیراعلیٰ پنجاب چودھری پرویز الٰہی کو ضمنی الیکشن لڑنے کی اجازت دینے کا سنگل بنچ کا فیصلہ لاہور ہائیکورٹ میں چیلنج کر دیا گیا۔رہنما تحریک انصاف چودھری پرویز الٰہی کو پی پی 32 سے ضمنی الیکشن لڑنے کی اجازت دینے کیخلاف چودھری محمد ارشد نامی شہری نے لاہور ہائیکورٹ میں درخواست دائر کی جس میں الیکشن کمیشن اور پرویز الہی سمیت دیگر کو فریق بنایا گیا ہے۔درخواست گزار نے موقف اختیار کیا ہے کہ سنگل بنچ نے قانون کے منافی چودھری پرویز الٰہی کو الیکشن لڑنے کی اجازت دی۔درخواست میں استدعا کی گئی ہے کہ لاہور ہائیکورٹ سابق وزیراعلی پنجاب چودھری پرویز الٰہی کو الیکشن لڑنے کی اجازت دینے کا سنگل بنچ کا فیصلہ کالعدم قرار دے۔