لاہور( خلیج نیوز)صوبائی دارالحکومت لاہور سمیت پنجاب بھر میں نابالغ بچوں کی شادی اور نکاح فارم کالم پُر نہ کرنے کا انکشاف ہوا ہے۔سیکرٹری بلدیات پنجاب کو 100 سے زائد کم عمر شادی اور نکاح فارم کے کیسز پر درخواستیں موصول ہوئی ہیں۔ذرائع کے مطابق نکاح رجسٹرار اور سیکرٹری یونین کونسلز کو نکاح فارم کے کالم پُر نہ کرنے کا ذمہ دار قرار دیا گیا ہے، چائلڈ میرج ایکٹ 1929 اور مسلم فیملی لا ء آرڈیننس 1961 پرعملدرآمد میں کوتاہی کے مرتکب افراد کو جیل بھیجنے کا فیصلہ کر لیا گیا۔ذرائع نے بتایا ہے کہ چائلڈ میرج روکنے اور 1929 کے ایکٹ پر سختی سے عملدرآمد کے لیے ایڈوائزری جاری کردی گئی ہے۔

ایڈوائزری کے مطابق مسلم فیملی لا آرڈیننس کے تحت نکاح نامے کے تمام کالم پُر کرنا لازم ہے، مسلم فیملی لا ء آرڈیننس پر عملدرآمد نہ کرنے والے نکاح رجسٹرار کا لائسنس کینسل کیا جائے گا، نکاح رجسٹرار پر آرڈیننس کی خلاف ورزی پر فوری پیڈا ایکٹ لاگو کیا جائے گا۔ذرائع کا کہنا ہے کہ نکاح کے وقت کوائف کا اندراج یقینی بنانا رجسٹرار کی ذمہ داری ہے، رجسٹرار خصوصاً عمر کا خانہ لازمی پر کرنے کا پابند ہو گا، زبانی کلامی عمر سن کر نکاح پڑھانے والے نکاح رجسٹرار کو جیل بھیجا جائے گا۔سیکریٹری بلدیات پنجاب شکیل احمد میاں کی جانب سے ہدایت کی گئی ہے کہ دوران نکاح دلہا اور دلہن کے شناختی کارڈ، بے فارم یا سکول سرٹیفکیٹ کی چیکنگ کو یقینی بنایا جائے، میونسپل کمیٹیاں اور یونین کونسلز احکامات پر عملدرآمد یقینی بنائیں، کم عمری کی شادیوں کو روکنے میں رجسٹرار اور سیکرٹریز کردار ادا کریں۔

لاہور( خلیج نیوز) پروونشنل ڈیزاسٹر مینجمنٹ اتھارٹی نے پنجاب میں مزید مون سون بارشوں کا الرٹ جاری کردیا۔ترجمان پی ڈی ایم اے کے مطابق موسمی صورتحال کے بارے میں متعلقہ انتظامیہ کو الرٹ جاری کر دیا گیا ہے۔ترجمان نے بتایا کہ مون سون بارشوں کا نیا اسپیل آج جمعہ سے شروع ہوگا۔جمعہ سے 12 اگست تک پنجاب میں مون سون بارشوں کا امکان ہے جس کے پیش نظر متعلقہ انتظامیہ کو الرٹ جاری کر دیا گیا ہے۔ترجمان نے مزید بتایا کہ 10 اور 11 اگست کے دوران جنوبی پنجاب کے متعدد اضلاع میں بارش متوقع ہے۔

لاہور (خلیج نیوز)پنجاب کے بیشتر اضلاع میں آئندہ 2روز میں مون سون بارشوں کے امکانات ہیں۔ مری، راولپنڈی، اٹک، منڈی بہائوالدین، سیالکوٹ، گجرات، گوجرانوالہ، لاہور، اوکاڑہ، قصور، ساہیوال، خوشاب، فیصل آباد ، سر گو دھا، نورپورتھل اور دیگر اضلاع میں تیز ہوائوں اور گرج چمک کے ساتھ بارش کا امکان ہے۔ گزشتہ 24گھنٹوں میں راولپنڈی 43ملی میٹر سیالکوٹ 21، چکوال 17، گجرات 16، مری 13اور خانپور میں 11ملی میٹر بارش ریکارڈ کی گئی۔ مون سون بارشوں کے باعث دریاں، ڈیمز اور ندی نالوں میں پانی کی سطح میں اضافہ ہو رہا ہے۔ 7سے 13اگست تک دریائے چناب اور راوی سے منسلک ندی نالوں میں طغیانی کا خدشہ ہے۔

دریائے سندھ میں چشمہ اور تونسہ کے مقام پر درمیانے درجے کا سیلاب جبکہ تربیلا اور کالا باغ کے مقام پر نچلے درجے کی سیلابی صورتحال ہے۔ ڈی جی پی ڈی ایم اے عرفان علی کاٹھیا کا کہنا تھا کہ ممکنہ سیلابی خطرے کے پیش نظر تمام تر انتظامات مکمل ہیں۔ وزیر اعلی پنجاب کی ہدایات کے مطابق انتظامیہ اور متعلقہ محکمے الرٹ ہیں۔ شہری احتیاطی تدابیر اپنائیں اور حکومتی ہدایات پر عمل کریں۔ رواں سال مون سون سیزن میں 55 شہری جانبحق اور 145 زخمی ہوئے۔ اموات آسمانی بجلی اور بوسیدہ عمارتوں کے گرنے کے باعث ہوئیں۔ وزیر اعلی پنجاب کی ہدایات کے مطابق جانبحق افراد کے لواحقین کی مالی امداد کی جا رہی ہے۔ احتیاطی تدابیر اختیار کر کے قیمتی جانی نقصان سے بچا جا سکتا ہے۔ کمزور و بوسیدہ عمارتوں میں ہرگز رہائش پذیر نہ ہوں۔ ایمرجنسی کی صوتحال میں پی ڈی ایم اے کی ہیلپ لائین 1129 پر رابطہ کریں۔