ڈھاکہ(خلیج نیوز)بنگلہ دیش کے علاقے کھلنا میں سقوط ڈھاکا کی یاد گار پر حملہ کر کے اسے توڑ دیا گیا ۔غیرملکی خبررساں ادارے کی رپورٹ کے مطابق مجیب نگر نامی علاقے میں 1971کے شہید میموریل کمپلیکس میں موجود یاد گار جس میں پاکستانی فوج کی طرف سے ہندوستانی افواج اور بنگلہ دیش کی مکتی باہنی کو ایک دستاویز پر دستخط کرتے ہوئے دکھایا گیا تھا کو توڑ دیا گیا ہے۔بنگلہ دیش میں سابق وزیر اعظم شیخ حسینہ واجد کی حکومت کے خلاف احتجاج کرنے والوں نے پرتشدد کارروائیوں میں بنگلہ دیش میں مقیم بھارتی ہندو شہریوں کیساتھ ساتھ مقامی ہندووں کو بھی نشانہ بنایا ہے جس کی وجہ سے سینکڑوں ہندو بھارت جانے کیلئے بنگلہ دیش کے بھارت سے ملحق سرحدی علاقوں میں جمع ہیں جبکہ بھارت نے ان لوگوں کو ملک میں داخل ہونے سے روکنے کیلئے اپنی سرحدوں کی نگرانی سخت کر دی ہے۔رپورٹ کے مطابق بھارتی اپوزیشن جماعت کانگریس کے رہنما ششی تھروڑنے سقوط ڈھاکہ کی یادگارتوڑنے اور ہندووں کے خلاف حملوں کو بھارت مخالف قرار دیتے ہے اس پر افسوس کا اظہار کیا ہے اور کہا ہے کہ بھارت اس مشکل وقت میں بنگلہ دیش کے لوگوں کے ساتھ کھڑا ہے، لیکن اس طرح کی زیادتی کو کبھی معاف نہیں کیا جا سکتا ۔

واشنگٹن(خلیج نیوز)ایک امریکی شخص جس نے ٹیکساس میں مسلمانوں کی ملکیت والی گاڑی مرمت کی دکان پر فائرنگ کر کے ایک شخص کو ہلاک اور چار کو زخمی کر دیا تھا، اسے نفرت پر مبنی جرائم کے الزام میں 37 سال قید کی سزا سنا دی گئی۔غیرملکی خبررساں ادارے کے مطابق 2018 میں 39 سالہ انتھونی پاز ٹوریس کو 2015 میں کرسمس سے ایک دن قبل ڈیلاس میں عمر ویلز اینڈ ٹائرز پر حملے کا مجرم قرار دیا گیا تھا اور 35 سال سلاخوں کے پیچھے رہنے کی سزا سنائی گئی تھی۔

اس نے گذشتہ سال ستمبر میں وفاق کی طرف سے علیحدہ نفرت انگیز جرائم کے الزامات کا اعتراف کیا تھا اور اسے بدھ کو 37 سال کی اضافی سزا سنائی گئی تھی جس میں سے جیل میں گذرا ہوا وقت منہا کر دیا گیا۔اٹارنی جنرل میرک گارلینڈ نے ایک بیان میں کہاکہ اسلامو فوبیا یا کسی بھی قسم کے تعصب کی وجہ سے ہونے والے نفرت انگیز جرائم کا محکمہ انصاف کی پوری طاقت سے مقابلہ کیا جائے گا۔ اس ملک میں کوئی بھی فرد خوف میں نہ رہے کہ وہ کون ہے، وہ کیسا نظر آتا ہے یا کیسے عبادت کرتا ہے۔

ایف بی آئی کے ڈائریکٹر کرسٹوفر رے نے کہا کہ ٹوریس نے مسلمانوں کے کاروبار کی جگہ پر متثرین کو دانستہ نشانہ بنایا۔رے نے کہا، یہ معاملہ اس بات کی کراہت انگیز مثال ہے کہ ہمارے اپنے ملک میں اسلامو فوبیا کتنا مہلک ہو سکتا ہے اور کسی بھی ایسے شخص کے لیے اس کے نتائج کتنے سنگین ہو سکتے ہیں جو نفرت انگیز تشدد کی کارروائیوں کا ارتکاب کرے۔عدالتی دستاویزات کے مطابق ٹوریس نے مسلم مخالف تبصرے کرنے کے بعد عمر ویلز اینڈ ٹائرز کے ملازمین اور صارفین پر فائرنگ کر دی جس سے ایک راہ گیر شدید زخمی ہو گیا تھا۔