کراچی (خلیج نیوز) سندھ فوڈ اتھارٹی کی ٹیم نے ضلع ایسٹ میں کارروائی کی۔کارروائی ڈائریکٹر جنرل سندھ فوڈ اتھارٹی آغا فخر حسین کی نگرانی میں کی گئی۔ اس موقع پر ڈائریکٹر آپریشنز رفیق میمن ، ڈپٹی ڈائریکٹر ایسٹ ارجیل میمن اور دیگر افسران بھی موجود تھے۔ کارروائی سحری سے قبل کی گئی۔ سندھ فوڈ اتھارٹی کی ٹیم نے باب سوئٹس پر ڈھائی لاکھ روپے جرمانہ جبکہ ریڈ ایپل کی دونوں شاخوں پر ایک لاکھ بیس ہزار روپے جرمانہ عائد کیا ۔ یہ جرمانے صفائی ستھرائی کی ناقص صورتحال پر کئے گئے ۔ ریڈ ایپل پر موجود زائد المعیاد کھانے پینے کی اشیا کو موقع پر ہی ضائع کردیا گیا۔

سندھ فوڈ اتھارٹی کی ٹیم نے مرغی کا گوشت فروخت کرنے والوں کی دکانوں کا بھی معائنہ کیا۔ ٹیم نے زائد المعیاد مرغی کا گوشت موقع پر ہی ضائع کردیا گیا۔ متعدد دکانوں کو امپرومنٹ نوٹسز بھی جاری کئے گئے۔ اس موقع پر گفتگو کرتے ہوئے ڈائریکٹر جنرل سندھ فوڈ اتھارٹی آغا فخر حسین نے کہا کہ حفظان صحت کے اصولوں پر کوئی سمجھوتہ نہیں کیا جائے گا ۔ سندھ فوڈ اتھارٹی کی ایس او پیز پر عمل نہ کرنے والوں کے خلاف سخت کارروائی کی جائے گی ۔