کراچی(خلیج نیوز)ایک نئی تحقیق میں معلوم ہوا ہے کہ جو لوگ ہفتے کے آخر میں بھرپور نیند لیتے ہیں ان میں دل کی بیماری کے خطرات 20 فیصد تک کم ہو سکتے ہیں۔برطانیہ سے تعلق رکھنے والے 90 ہزار سے زائد افراد کے اعداد و شمار سے پتہ چلتا ہے کہ ہفتے کے دوران نیند کی کمی کی تلافی ہفتے کے آخر میں اضافی اسنوز ٹائم کے ساتھ کی جاسکتی ہے جس سے نیند کی کمی کے منفی اثرات کو کم کیا جاسکتا ہے۔یورپین سوسائٹی آف کارڈیالوجی کانگریس 2024 میں پیش کیے جانے والے نتائج سے یہ بات سامنے آئی کہ نیند سے محروم افراد جو ہفتے کے آخری دنوں میں زیادہ نیند لیتے ہیں ان میں دل کی بیماری کا خطرہ ان لوگوں کے مقابلے میں 20 فی صد کم ہوتا ہے جو ہفتے کے آخر میں آنکھیں بند نہیں کرتے تھے یا اس سے بھی کم سوتے تھے۔چین کے شہر بیجنگ میں واقع فوائی ہسپتال کے نیشنل سینٹر فار کارڈیو ویسکیولر ڈیزیز سے تعلق رکھنے والے تحقیق کے مصنف یانجن سونگ کا کہنا تھا کہ مناسب نیند دل کی بیماری کے کم خطرے سے منسلک ہے۔یہ تعلق ان افراد میں اور بھی واضح ہو جاتا ہے جو ہفتے کے دنوں میں باقاعدگی سے ناکافی نیند لیتے ہیں۔

کراچی(خلیج نیوز)تحقیقات میں یہ بات سامنے آئی ہے کہ وزن کم کرنے والی معروف دوا ویگووی دل کے دورے اور فالج کے امکانات کو کم کر سکتی ہے۔یونیورسٹی کالج لندن کی جانب سے شائع کردہ مطالعے کے سرکردہ مصنف ڈاکٹر جان ڈین فیلڈ نے کہا کہ یہ تلاش ان مریضوں میں ویگووی کے استعمال کے بارے میں تشویش کو دور کرنے میں بھی مدد کرتی ہے جو اس کے ضمنی اثرات کو لیکر پریشان ہیں۔انہوں نے کہا یہ اہم ہے کیونکہ یہ خدشات موجود تھے کہ ویگووی دل کے امراض کے کچھ متاثرہ لوگوں کے لیے نقصان دہ ہو سکتی ہے جسے لو انجیکشن فریکشن کہا جاتا ہے تاہم حالیہ تحقیق اس کے برعکس ثابت کرتی ہے۔یونیورسٹی میں کارڈیالوجی کے پروفیسر ڈین فیلڈ نے کہا کہ ہمارے نتائج سے پتہ چلتا ہے کہ ویگووی کا فائدہ متعدد دل کی بیماریوں والے افراد کو بھی ہوسکتا ہے۔

کراچی(خلیج نیوز)ماہرین نے ایک مطالعے میں پایا ہے کہ ماحولیاتی درجہ حرارت میں شدت حاملہ خواتین میں حمل اور ذیابیطس اور تھائرائیڈ کے امراض کا سبب بن سکتی ہے۔مطالعے میں خواتین کے ہارمونز پر گرمی کے اثرات کا جائزہ لیا گیا ہے- ہارمونز، انسولین سے ایسٹروجن تک تقریبا تمام حیاتیاتی افعال میں کردار ادا کرتے ہیں بشمول بلڈ شوگر کنٹرول، صحت مند تولیدی نظام، بلوغت اور حمل۔017 کی ایک تحقیق سے پتا چلا ہے کہ زیادہ درجہ حرارت جسم میں موجود گلوکوز کی مقدار کو متاثر کر سکتا ہے جس سے ذیابیطس کے مرض میں اضافہ ہوتا ہے۔سنگاپور اور برطانیہ کے سائنسدانوں نے ہارمونز اور اینڈوکرائن سسٹم کو متاثر کرنے والی گرمی سے متعلق شواہد اکٹھے کیے جو ان ہارمونز کی تخلیق اور اخراج کا ذمہ دار ہے۔تحقیق میں شامل ایسوسی ایٹ پروفیسر جیسن لی نے کہا کہ حاملہ خواتین کے لیے، اعداد و شمار سے پتہ چلتا ہے کہ گرمی قبل از وقت پیدائش، کم وزن پیدائش، مردہ پیدائش اور حمل ذیابیطس کا خطرہ بڑھاتی ہے۔

کراچی(خلیج نیوز) محققین کا اندازہ ہے کہ دنیا بھر میں تقریبا 529 ملین لوگ شوگر کے مریض ہیں جن میں سے 90% سے 95% ٹائپ 2 ذیابیطس میں مبتلا ہیں۔ذیابیطس کے شکار افراد میں دل کی بیماری، اعصابی خرابی، گردے کی بیماری، مسوڑھوں کی بیماری، ڈیمنشیا، موڈ کی خرابی اور بصری مسائل سمیت سنگین پیچیدگیاں پیدا ہونے کا خطرہ زیادہ ہوتا ہے۔اگر ذیابیطس والے اشخاص کو ان میں سے ایک سے زیادہ پیچیدگیاں ہوں تو انہیں متعدد طویل المیعاد طبی حالتوں کا شکار کہا جاتا ہے جسے طبی اصطلاح میں MLTCs کہا جاتا ہے۔امپیریل کالج لندن کے محققین رپورٹ کرتے ہیں کہ ذیابیطس نہ صرف MLTCs کے آغاز کو 15-20 سال تک زیادہ کردیتا ہے بلکہ ان MLTCs کے نتیجے میں ذیابیطس کے شکار لوگوں میں متوقع عمر میں نمایاں کمی واقع ہوتی ہے۔یہ تحقیق حال ہی میں نیچر میڈیسن نامی جریدے میں شائع ہوئی ہے۔

کراچی(خلیج نیوز)ایک نئی تحقیق میں بتایا گیا ہے کہ پلاسٹک کی بوتلوں سے پانی پینا بلڈ پریشر کو بڑھا سکتا ہے۔ایک اور تحقیق کے مطابق شیشے کی بوتلوں میں موجود مائع میں بھی مائیکرو پلاسٹک پائے گئے ہیں۔ ماہرین کے مطابق ان ذرات کا بلند فشار خون سے تعلق رکھتا ہے جو قلبی مرض کے خطرات میں اضافے کا سبب ہوسکتا ہے۔تازہ ترین مطالعے سے پتہ چلا ہے کہ تحقیق کے شرکا میں بلڈ پریشر اس وقت کم ہوا جب انہوں نے پلاسٹک اور شیشے کی بوتلوں سے پانی سمیت تمام مائع کا استعمال بند کر دیا اور دو ہفتوں تک صرف نلکے کا پانی پیا۔آسٹریا کی ڈنوبے پرائیوٹ یونیورسٹی کے محققین نے کہاکہ تحقیق سے نتیجہ اخذ کیا گیا کہ پلاسٹک بوتلوں میں موجود مشروبات سے اجتناب کرنا چاہیے۔تحقیق کے نتائج میں پہلی بار بتایا گیا ہے کہ پلاسٹک کے استعمال میں کمی بلڈ پریشر کو کم کر سکتی ہے، جس کی ممکنہ وجہ خون میں پلاسٹک ذرات کی کمی ہوسکتی ہے جس سے قلبی صحت کو لاحق خطرات میں کمی ہوسکتی ہے۔