پشاور (خلیج نیوز)صوبائی وزیرِ قانون آفتاب عالم نے کہا ہے کہ خیبر پختون خوا حکومت نے 9 مئی کے واقعات کی تحقیقات کے لیے انکوائری کمیشن قائم کرنے کا فیصلہ کر لیا ہے۔نجی ٹی وی سے گفتگو کرتے ہوئے آفتاب عالم نے کہا کہ فیصلے کی حتمی منظوری وزیرِ اعلیٰ علی امین گنڈاپور سے لی جائے گی۔آفتاب عالم نے کہا کہ انکوائری ججز سے کرانے کے پابند نہیں، عدلیہ انکوائری نہیں کرنا چاہتی تو خود انکوائری کمیشن قائم کریں گے۔صوبائی وزیر نے کہا کہ انکوائری ایکٹ میں انکوائری کرنے والے کو سول جج کے اختیارات حاصل ہیں، ججز سے اس لیے انکوائری کرانا چاہتے تھے کہ عدلیہ پر اعتماد زیادہ ہے۔ایڈووکیٹ جنرل کے پی شاہ فیصل اتمان خیل نے کہا ہے کہ صوبائی حکومت کو دوبارہ ہائی کورٹ کو خط لکھنے کا مشورہ دیا تھا۔انہوں نے کہا کہ صوبائی حکومت کو خط لکھ کر تمام تفصیلات سے آگاہ کیا ہے، ہائی کورٹ سے جوڈیشل انکوائری کے لیے ججز مانگے تھے۔ایڈووکیٹ جنرل نے کہا کہ ہائی کورٹ نے ہمارے خط پر اعتراض لگا کر واپس کر دیا تھا۔