کراچی(خلیج نیوز) محکمہ موسمیات نے سمندری طوفان سے متعلق چوتھا الرٹ جاری کر دیا جس کے مطابق شمال مشرقی بحیرہ عرب میں سمندری طوفان بن گیا ہے۔محکمہ موسمیات نے الرٹ میں بتایا کہ کراچی سے تقریبا 170 کلو میٹر جنوب اور جنوب مشرق میں موجود ہے، طوفان ابتدائی طور پر مغرب اور شمال مغرب کی طرف بڑھتا رہے گا۔طوفان کے باعث کراچی، حیدر آباد، تھرپارکر، بدین، ٹھٹھہ اور سجاول میں موسلادھار بارش کا امکان ہے جبکہ ٹنڈو محمد خان، ٹنڈوالہ یار، مٹیاری، عمر کوٹ، میرپور خاص اور سانگھڑ میں بادل جم کر برس سکتے ہیں۔

الرٹ میں ہدایت کی گئی کہ 31 اگست تک ماہی گیر کھلے سمندر میں نہ جائیں۔طوفانی بارش کے پیش نظر کراچی ایئرپورٹ پر الرٹ جاری کیا گیا جس میں محفوظ فلائٹ آپریشن کے دوران ہنگامی اور حفاظتی اقدامات کی ہدایات کی گئیں۔پاکستان ایئرپورٹ اتھارٹی نے محفوظ فلائٹ آپریشن کے دوران ہنگامی اور حفاظتی اقدامات کی ہدایات جاری کرتے ہوئے کہا کہ رن ویزاور ٹارمک ایریاز میں جمع پانی کی نکاسی کو فوری ممکن بنایا جائے۔پی اے اے کا کہنا تھا کہ کراچی ایئرپورٹ پر پانی کی موجودگی سے طیاروں کے پھسلنے کا خدشہ رہتا ہے، جناح ٹرمینل پر احتیاطی تدابیر کو یقینی بنایا جائے۔ہلکے وزن کے فکس ونگز، روٹری ونگز جہازوں کو محفوظ مقامات پر پارک کر دیا گیا اور چھوٹے ساخت کے طیاروں کے ساتھ اضافی وزن باندھے گئے۔

اسلام آباد (خلیج نیوز)این ڈی ایم اے نے بلوچستان میں 20تا 22 اگست کے دوران مزید بارشوں کے پیش نظر متعلقہ محکمو ں کو الرٹ جار ی کر دیا۔ تفصیلات کے مطابق این ڈی ایم اے کے نیشنل ایمرجنسی آپریشن سینٹر نے20تا22اگست کے دوران بلوچستان میں شمال مشرقی ژوب، قلعہ سیف اللہ، پشین، کوئٹہ، زیارت، قلات اور بلوچستان کے مشرقی علاقوں، خضدار،دادو، لسبیلہ، آواران، جھل مگسی، واشک، کچھی اور جعفرآبادکے علاقوں میں مزید بارشوں کی پیش گوئی کی ہے، بارش کے باعث خضدار، دادو، لسبیلہ، آواران، جھل مگسی، واشک، موسی خیل، دکی، بارکھان، سبی اور کوہلو کے ندی نالوں میں طغیانی کا امکان ہے۔ پانی کی بہاو میں اضافہ دریاو ں پر موجود پلوں کو نقصان پہنچا سکتا ہے۔ این ڈی ایم اے نے متعلقہ اداروں کی ہدایت کی ہے کہ وہ متوقع سیلابی صوررتحال کے ممکنہ اثرات کو کم کرنے کے لیے ضروری احتیاطی تدابیر اختیار کریں۔

این ڈی ایم اے نے مقامی حکام اور ریسکیو سروسز کو ہائی الرٹ رہنے کی ہدایات جاری کی ہیں۔متعلقہ انتظامیہ کو ہدایت کی گئی ہے پلوں اور چھوٹے ڈیموں کی باقائدہ نگرانی جاری رکھی جائے۔ این ڈی ایم اے تمام متعلقہ اداروں کو ہدایات جاری کی ہیں وہ سیلاب اور لینڈ سلائیڈنگ کے ممکنہ اثرات کو کم کرنے کے لیے ضروری احتیاطی تدابیر اختیار کریں۔ ایمرجنسی رسپانس ٹیموں کو الرٹ کرنے کے ساتھ ساتھ کسی بھی ممکنہ ہنگامی صورتحال پر فوری رسپانس کو یقینی بنانے کے لیے وسائل کی دستیابی کو یقینی بنانے کی بھی ہدایت کی ہے۔ عوام سے التماس ہے سیلابی صورتحال سے بچائوکیلئے احتیاطی تدابیر اپنائیں علاوہ ازیں مسافراور سیاح لینڈ سلائیڈنگ کے خطرے کے پیش نظر پہاڑی علاقوں کے سفر سے گریز کریں۔این ڈی ایم اے نے پاک این ڈی ایم اے ڈیزاسٹر الرٹ ایپلیکیشن متعارف کرائی ہے جو گوگل پلے سٹور اورiOSایپ سٹور پر موجود ہے تاکہ عوام کوبر وقت الرٹس، ایڈوائزریز اور خطرے سے متعلق مخصوص گائیڈ لائنز، عوامی آگاہی کے پیغامات اوردیگر ضروری معلومات کی فراہمی ممکن بنائی جا سکے۔

لاہور ( خلیج نیوز) پنجاب کے بیشتر اضلاع میں مون سون بارشوں کے پیش نظر پی ڈی ایم اے پنجاب نے الرٹ جاری کیا۔ ملتان 116 ملی میٹر، خانیوال 51، رحیم یار خان 53، ڈیرہ غازی خان 35، لیہ 31، بھکر 14، جہلم 12 جبکہ جوہرآباد میں 7 ملی میٹر بارش ریکارڈ کی گئی۔ آئندہ 24 گھنٹوں میں پنجاب کے بیشتر اضلاع میں مزید مون سون بارشوں کی پیشگوئی کی گئی ہے۔ لاہور راولپنڈی فیصل آباد گوجرانولہ ملتان بہاولپور سرگودھا گجرات ڈیرہ غازی خان اور ساہیوال میں بارشیں متوقع ہیں۔ ڈی جی پی ڈی ایم اے عرفان علی کاٹھیا نے صوبہ بھر کے ڈپٹی کمشنرز کو الرٹ رہنے کی ہدایات جاری کیں۔ ڈی جی پی ڈی ایم اے عرفان علی کاٹھیا کا کہنا تھا کہ ہنگامی صورتحال سے نمٹنے کے لیے متعلقہ محکمے الرٹ رہیں۔ بڑے شہروں کی انتظامیہ اربن فلڈنگ کے خدشے کے پیش نظر ہائی الرٹ رہے۔ پی ڈی ایم اے کنٹرول روم میں صورتحال کی مانیٹرنگ 24/7جاری ہے۔ 1122سمیت دیگر ریسکیو ادارے مشینری سمیت عملے کو الرٹ رکھیں۔ نشینی علاقوں سے پانی کی نکاسی کو جلد از جلد ممکن بنائیں۔ مون سون بارشوں کا سلسلہ 20اگست تک جاری رہنے کی پیشگوئی ہے۔ شہری احتیاط کریں بجلی کے کھمبوں اور لٹکتی تاروں سے دور رہیں۔ عوام الناس کچے مکانات اور بوسیدہ عمارتوں سے دور رہیں۔ بچوں کا خاص خیال رکھیں انہیں نشیبی علاقوں میں جمع پانی کے قریب ہرگز نہ جانے دیں۔ ہنگامی صورتحال میں پی ڈی ایم اے کی ہیلپ لائن 1129پر کال کر ی۔

لاہور( خلیج نیوز) پروونشنل ڈیزاسٹر مینجمنٹ اتھارٹی نے پنجاب میں مزید مون سون بارشوں کا الرٹ جاری کردیا۔ترجمان پی ڈی ایم اے کے مطابق موسمی صورتحال کے بارے میں متعلقہ انتظامیہ کو الرٹ جاری کر دیا گیا ہے۔ترجمان نے بتایا کہ مون سون بارشوں کا نیا اسپیل آج جمعہ سے شروع ہوگا۔جمعہ سے 12 اگست تک پنجاب میں مون سون بارشوں کا امکان ہے جس کے پیش نظر متعلقہ انتظامیہ کو الرٹ جاری کر دیا گیا ہے۔ترجمان نے مزید بتایا کہ 10 اور 11 اگست کے دوران جنوبی پنجاب کے متعدد اضلاع میں بارش متوقع ہے۔