لاہور(خلیج نیوزی)ہنی ٹریپ کے ذریعے لوگوں کو بلیک میل کر کے رقم ہتھیانے والے بین الاضلاعی گینگ کے مرد و خواتین سمیت 8ملزمان گرفتار کرلیے گئے۔پولیس کے مطابق گرفتار ملزمان میں عقیل ، آصف، اشرف، اور عظیم جبکہ خواتین ملزمان میں عروج، کومل ،عابدہ بی بی اور شمیم بی بی شامل ہیں۔پولیس کے مطابق خواتین ملزمان فون کر کے امیر لوگوں کو اپنے جال میں پھنساتیں اور ملنے کے لیے مخصوص مقام پر بلاتیں،جہاں پر ساتھی ملزمان گن پوائنٹ پر لوگوں کی نازیبا ویڈیو بنالیتے۔پولیس کا بتانا ہے کہ ملزمان متاثرہ لوگوں کی ویڈیو بنانے کے بعد نقدی، موبائل فونز اور دیگر قیمتی سامان بھی چھین لیتے، ملزمان متاثرہ شخص سے فون کرواکر ان کے عزیز واقارب سے رقم منگواتے اور اپنے اکائونٹ میں ٹرانسفر کر لیتے۔پولیس کے مطابق ملزمان متاثرہ شخص سے مزید رقم ہتھیانے کے لیے متعلقہ تھانوں میں زناء کاری کی ایف آئی آر بھی درج کروا دیتے تھے ، ملزمان کے خلاف پولیس کی جانب سے قانونی کارروائی کا آغازکردیا گیا ۔

فیصل آباد (خلیج نیوز)ہنی ٹریپ کے شکار فیصل آباد کے نوجوان کے ایک ماہ سے کچے کے ڈاکوؤں کی قید میں ہونے کا انکشاف ہوا ہے۔ ڈاکوؤں نے اہلِ خانہ سے 50 لاکھ روپے تاوان طلب کر رکھا ہے، مغوی کے والد نے بیٹے کی بازیابی کے لیے وزیرِ اعظم اور وزیرِ اعلیٰ پنجاب سے مدد کی اپیل کر دی۔

پولیس کے مطابق چک جھمرہ کا رہائشی نوجوان سجاد 1 ماہ قبل ملت ٹاؤن کے علاقے سے لاپتہ ہوا تھا، جس کے بعد اس کے اہلِ خانہ کو فون پر اغواء کرنے کی اطلاع دیتے ہوئے اغواء کاروں نے ڈیڑھ کروڑ تاوان مانگا جسے بعد میں کم کر کے 50 لاکھ روپے کر دیا گیا۔ مغوی کے والد عبدالولی کے مطابق ڈاکوؤں نے فون کے ذریعے اس کے بیٹے سے کئی مرتبہ بات کروائی ہے، بیٹے سے بتایا کہ اسے باندھ کر رکھا ہوا ہے اور ڈاکو اس پر تشدد کرتے ہیں۔