اسلام آباد(خلیج نیوز)پاکستان میں بجلی تقسیم کار کمپنیوں کی نجکاری پر غیر سرکاری تنظیم نے اعداد و شمار پر مبنی رپورٹ جاری کردی ۔رپورٹ کے مطابق کے الیکٹرک ملک کی واحد نجی شعبے کی بجلی تقسیم کار کمپنی ہے،عالمی مالیاتی ادارے آئی ایم ایف نے حکومتی ملکیتی ڈسٹری بیوشن کمپنیوں کی نجکاری کی شرط عائد کی ہے۔رپورٹ میں بتایا گیاکہ ریاستی ملکیت کی تقسیم کار کمپنیاں ترسیل اور تقسیم کے نقصانات کم کرنے میں زیادہ پیشرفت نہیں کرسکیں۔رپورٹ کے مطابق نجکاری کے بعد کے الیکٹرک کے ترسیل اور تقسیم کے نقصانات میں 52فیصد بہتری آئی، نجکاری کے بعد کے الیکٹرک کے صارفین کی تعداد میں اضافہ ہوا ہے۔

رپورٹ میں بتایاگیاکہ عالمی بینک کے مطابق کے الیکٹرک کی نجکاری سے حکومت اور صارفین کو 900ارب روپے سے زائد کی بچت ہوئی ہے۔اعداد و شمار کے مطابق انرجی سیکٹر کا گردشی قرضہ 2اعشاریہ 9ہزار ارب روپے ہوگیا ہے جس میں کے الیکٹرک کا حصہ صفر ہے۔رپورٹ کے مطابق نجکاری کے بعد سے کے الیکٹرک کو حکومت نے کوئی آپریشنل سبسڈی نہیں دی، سرکاری ملکیت کی بجلی تقسیم کار کمپنیوں کے نقصانات کی وجہ سے گردشی قرضہ بڑھ رہا ہے۔اعداد و شمار کے مطابق ملک میں بجلی تقسیم کار کمپنیوں کی نجکاری کے حوالے سے کے الیکٹرک واحد مثال ہے، کے الیکٹرک کی نجکاری کے بعد بجلی ترسیل اور تقسیم کے نیٹ ورک اور بجلی فروخت میں بھی اضافہ ہوا۔