لاہور(خلیج نیوز)چیئرمین کسان اتحاد چوہدری خالد حسین باٹھ نے کہا ہے کہ گندم کی امدادی قیمت کم مقرر کرنے پر عید کے بعد پنجاب کے کسان بھرپور احتجاج کریں گے۔ایک بیان میں انہوں نے کہا کہ حکومت نے گندم کی امدادی قیمت 3900 روپے فی من مقرر کی جو کہ بہت کم ہے، گزشتہ سال کی امدادی قیمت 4000 روپے تھی اب تو پیداواری لاگت بھی بڑھ چکی ہیں۔انہوں نے کہا کہ کھا دیں، یوریا، ڈی اے پی، بجلی اور ڈیزل سمیت تمام لوازمات پر کسان سے بلیک میں دگنی قیمتیں وصول کی گئی ہیں، زرعی مداخل دگنا سے بھی تجاوز کر چکے ہیں، مہنگائی کے تناسب سے ریٹ مقرر کرنے کی بجائے حکومت نے گزشتہ سال سے بھی کم ریٹ لگا دیا ۔

خالد حسین باٹھ نے کہا کہ وزیراعلی پنجاب مریم نواز نے دعوے کئے تھے میں خدمت کروں گی، لیکن افسوس وہ اپنے پہلے ہی دعوے میں ناکام ہو چکی ہیں، کسان دشمن اور ظالمانہ پالیسی بنائی گئی ہے، ہمارا مطالبہ ہے کہ حکومت کم از کم 5000 روپے فی من قیمت کا اعلان کرے۔انہوں نے مزید کہا کہ سندھ حکومت نے 4600 روپے گندم کی امدادی قیمت مقرر کی ہے لیکن پنجاب کے کسانوں کیلئے ظلم کیوں کیا جارہا ہے، عید الفطر کے بعد پورے پنجاب کے کسان بھرپور احتجاج کریں گے۔