کراچی(خلیج نیوز)خسارے کی شکار پاکستان ریلوے نے نو ٹرینیں پبلک پرائیویٹ پارٹنرشپ کے تحت چلانے کے لیے بولیاں طلب کرلی ہیں۔پاکستان ریلویز کی جانب سے ایک اشتہار جاری کیا گیا ہے، جس کے تحت نو ایکسپریس اور مسافر ٹرینوں کو آئوٹ سورس کیا جا رہا ہے۔ریلوے نے خسارے میں چلنے والی 22 مسافر ٹرینوں کو آئوٹ سورس کرنے کا فیصلہ کیا تھا، تاہم، ان کی آئوٹ سورسنگ کامیاب نہ ہوسکی، ریلوے نے 22 ٹرینوں کے نام منسوخ کرکے نئی 9 ٹرینوں کے نام جاری کردیے۔ہزارہ ایکسپریس، کراچی ایکسپریس، بہاء الدین زکریا ایکسپریس، مہر ایکسپریس، سکھر ایکسپریس، چناب ایکسپریس، مہران ایکسپریس کے علاوہ موہنجو دڑو پسنجر ٹرین اور راولپنڈی مسافر ٹرین ان ٹرینوں میں شامل ہیں جنہیں آئوٹ سورس کیا جا رہا ہے۔پاکستان ریلویز کے مطابق بولی کا انعقاد PPRA رولز کے سنگل اسٹیج ٹو لفافہ طریقہ کار کے ذریعے کیا جائے گا، تکنیکی بولیاں کمیٹی ہیڈ کوارٹر آفس میں 19 ستمبر 2024 کو صبح 11:00 بجے جمع کرائی جائیں گی۔پاکستان ریلویز کے مطابق آنے والی بولیاں 19 ستمبر 11 بج کر 30 پر کھولی جائیں گی۔