لاہور ( خلیج نیوز)وزیر اعلیٰ پنجاب مریم نواز شریف نے پاکستان کے جیولین تھرو کے لیجنڈ ارشد ندیم کے لئے 10کروڑ روپے انعام کا اعلان کر دیا ۔ وزیر اعلیٰ مریم نواز نے اپنے پیغام میں کہا کہ جشن آزادی پر ارشد ندیم نے گولڈ میڈیل جیت کر قوم کو تحفہ دیا، قوم کی طرف سے ارشد ندیم کو انعام دے کر ان کا شکریہ ادا کررہے ہیں۔وزیراعلی پنجاب مریم نوازشریف نے ارشد ندیم کے نام سے منسوب سپورٹس سٹی بنانے کا بھی اعلان کرتے ہوئے کہا کہ میاں چنوں میں ارشد ندیم سپورٹس سٹی بنے گا ۔ارشد ندیم نے تمام مشکلات کے باوجود 40سال بعد پاکستان کے لئے گولڈ میڈل جیتا، اولمپکس میں نیا ریکارڈ بنانا ارشد ندیم کی محنت، لگن اور قومی جذبے کا ثبوت ہے۔ انہوں نے کہا کہ پاکستانی پرچم دنیا میں بلند کرنے والے ہر بیٹے اور بیٹی کو اللہ تعالی ہمیشہ سربلند رکھے۔

لاہور (خلیج نیوز) وزیراعلیٰ پنجاب مریم نواز شریف نے صوبے میں پہلی ایئر ایمبولینس سروس جون میں شروع کرنے کا اعلان کر دیا ۔انہوں نے سماجی رابطے کی ویب سائٹ ایکس پر پیغام جاری کرتے ہوئے بتایا کہ پاکستان اور پنجاب کی پہلی ایئر ایمبولینس سروس کیلئے تربیتی سیشن کا آغاز کر دیا ہے، ایئر ایمبولینس سروس جون میں شروع ہو جائے گی۔وزیراعلی مریم نواز نے کہا کہ ٹریننگ سیشن میں پنجاب بھر کے مختلف بڑے ہسپتالوں کی رسائی کے لیے پروازیں کی گئیں۔ایمبولینس کی مشقی پرواز میں مریض کو ایمرجنسی صورت حال میں ہسپتال پہنچانے کی مشق کی گئی، وزیراعلی مریم نواز نے ریسکیو کے تربیتی سیشن کی وڈیو بھی شیئر کی۔مریم نواز کا مزید کہنا تھا کہ ایئر ایمبولینس سروس کا منصوبہ ریکارڈ وقت میں مکمل کیا گیا ہے، جو کہ جون میں شروع ہو جائے گی۔