اسلام آبا د(خلیج نیوز)صدرِ مملکت آصف زرداری نے اولمپک گولڈ میڈلسٹ ارشد ندیم کو ہلالِ امتیاز عطاء کر دیا۔ایوانِ صدر میں خصوصی تقریب میں ارشد ندیم کو ہلالِ امتیاز عطا کیا گیا۔واضح رہے کہ ارشد ندیم نے پیرس اولمپکس کے جیولن تھرو گیم میں نیزہ 92.97 میٹر تک پھینک کر عالمی ریکارڈ بنایا تھا اور پہلی مرتبہ پاکستان کے لیے گولڈ میڈل حاصل کیا تھا۔گولڈ میڈل جیتنے پر ارشد ندیم کو حکومت پاکستان کی جانب سے ہلالِ امتیاز دینے کا اعلان کیا گیا تھا۔
اسلام آباد (خلیج نیوز)صدر آصف زرداری نے سربراہ جے یو آئی (ف) مولانا فضل الرحمن سے ملاقات کی جس میں سیاسی روابط بحال کرنے کے عزم کا اظہار کیاگیا۔ تفصیلات کے مطابق صدر آصف زرداری وفاقی وزیر داخلہ محسن نقوی کے ہمراہ اسلام آباد میں سربراہ جے یو آئی (ف) مولانا فضل الرحمن کی رہائشگاہ گئے ، دونوں رہنمائوں نے ملاقات میں ملکی سیاسی صورتحال پر گفتگو کی، صدر مملکت نے مولانا فضل الرحمن کو آئندہ ہونے والی اہم قانون سازی پر اعتماد میں لیا ،ملاقات میں ملک کی سیاسی صورتحال کے علاوہ سیاسی روابط بحال کرنے پر تبادلہ خیال کیا گیا، مولانا نے عام انتخابات کے بعد اپنے تحفظات کا اظہار کرکے کچھ گلے شکوے کئے۔ذرائع کے مطابق صدر مملکت نے مولانا کے تمام تحفظات سن کر سیاسی تعاون طلب کیا،دونوں جانب سے روابط جاری رکھنے کے عزم کا اظہار کیا گیا۔اس موقع پر آصف علی زرداری نے مولانا فضل الرحمان کو بندوق تحفے میں پیش کی ۔خوشگوار ماحول میں ہونیوالی ملاقات میں مولانا عبدالغفور حیدری ، مولانا اسعد محمود ، اسلم غوری ،انجینئر ضیا الرحمان بھی موجود تھے ۔
