ریاض(خلیج نیوز )سعودی عرب میں ایک ہفتے کے دوران اقامہ، لیبر اور سرحدی خلاف ورزی پر مزید 17 ہزار 616 غیر قانونی تارکین کو حراست میں لیا گیا ہے۔میڈیارپورٹس کے مطابق سعودی سکیورٹی فورسز نے گزشتہ ایک ہفتے 15 سے 21 اگست 2024 کے دوران 11 ہزار 22 افراد کو اقامہ قانون، 4 ہزار 216 کو سرحدی امن قانون اور 4 ہزار216 تارکین کو قانون محنت کی خلاف ورزی پر پکڑا گیا ہے۔گرفتار افراد میں سے 883 افراد کو بھی حراست میں لیا گیا، ان میں سے 41 فیصد یمنی، 58 فیصد ایتھوپین اور ایک فیصد دیگر ملکوں سے تعلق رکھتے ہیں۔علاوہ ازیں 68 ایسے افراد کو بھی پکڑا گیا ہے جو سرحد پار کرکے مملکت سے نکلنے کی کوشش کررہے تھے۔

اقامہ، ملازمت اور سرحدی امن قانون کی خلاف ورزی کرنے والوں کو سفر، رہائش، روزگار اور پناہ دینے کی کوششوں میں ملوث 15 افراد کو بھی حراست میں لیا گیا ہے۔بیان میں کہا گیا کہ 14 ہزار 524 غیر قانونی تارکین کے خلاف قانونی کارروائی کی جا رہی ہے۔ ان میں سے 13 ہزار 471 مرد اور ایک ہزار71 خواتین ہیں۔2 ہزار70 افراد کے پاس سفری دستاویزات نہیں تھیں۔انہیں دستاویزات حاصل کرنے کے لیے سفارت خانوں سے رجوع کرنے کا موقع دیا گیا ہے جبکہ 5 ہزار926 افراد کے سفر کی کارروائی مکمل کی جا رہی ہے۔ 13 ہزار 952 کو مملکت سے بے دخل کیا گیا۔واضح رہے کہ سعودی عرب میں غیرقانونی تارکین وطن کو سفری، رہائشی یا ملازمت کی سہولت فراہم کرنا قانونا جرم ہے اور اس کے لیے مختلف سخت سزائیں مقرر ہیں۔

ریاض(خلیج نیوز)مکہ مکرمہ ریجن کے نائب گورنرآج (بدھ کو)مسجد الحرام میں خصوصی تقریب کے دوران کنگ عبدالعزیز بین الاقوامی مقابلہ حسن قرات و تحفیظ اور تفیسرقرآن 44 ویں ایڈیشن کے فاتحین کو اعزاز سے نوازیں گے۔سعودی میڈیا کے مطابقاس مقابلے کے نگراں وزیر اسلامی امور عبداللطیف بن عبدالعزیز آل شیخ نے کہا کہ مقابلے میں 123 ملکوں کے 173 شرکا نے حصہ لیا۔1978 میں اس مقابلے کے آغاز کے بعد اس سال اب تک سب سے زیادہ شرکا سامنے آئے ہیں۔ وزیر اسلامی امور کا کہنا تھاکہ یہ مقابلہ مملکت کی جانب سے قرآن پاک اور اسے حفظ کرنے والوں کی دیکھ بھال کو اجاگر کرتا ہے۔انہوں نے مکہ کے گورنر شہزادہ خالد الفیصل اور نائب گورنر شہزادہ سعود بن مشعل بن عبدالعزیز کا شکریہ اداکیا جنہوں نے مقابلے کو کامیاب بنانے میں تعاون کیا۔مقابلے کے فاتحین کو مجموعی طور پر 40 لاکھ ریال کے انعامات دیے جائیں گے۔

ریاض(خلیج نیوز)سعودی وزارت خارجہ نے اسرائیلی وزیر کی مسجد اقصی پر دھاوا بولنے کی شدید الفاظ میں مذمت کی ہے۔ غیرملکی میڈیا کے مطابق سعودی وزارت خارجہ نے کہاہے کہ اسرائیلی وزیر نے مسجد اقصی پر دھاوا بول کر مقدس مقامات کی بیحرمتی کی کوشش کی۔ وزارت خارجہ نے کہا کہ مقامات مقدسہ کے تقدس کا احترام اور تحفظ سعودی عرب سمیت کروڑوں مسلمانوں کی اولین ترجیح ہے۔ سعودی وزارت خارجہ کے مطابق مقامات مقدسہ کی بیحرمتی کسی بھی صورت برداشت نہیں کی جاسکتی۔

ریاض(خلیج نیوز) سعودی عرب میں ماہ شوال 1445 ہجری کا چاند نظر نہ آنے کا اعلان کردیا گیا ہے جس کے تحت عید الفطر 10 اپریل کو منائی جائے گی۔تفصیلات کے مطابق سعودی عرب میں عید کا چاند دیکھنے کے لئے رویت ہلال کمیٹی کا مرکزی اجلاس سدیر رسد گاہ میں ہوا جہاں رویت ہلال کمیٹی کے اراکین اور مایر فلکیات موجود تھے۔اس کے علاوہ دیگر علاقوں تمیر، طائف،جازان،مکہ مکرمہ کی رسد گاہوں میں بھی عید کا چاند دیکھنے کے لئے انتظامات کیے گئے۔ سپریم کورٹ کی ہدایت پر شہریوں نے بھی ماہ شوال کا چاند دیکھا۔بعد ازاں رویت ہلال کمیٹی نے ملک بھر میں چاند نظر نہ آنے کا اعلان کرتے ہوئے بتایا کہ عید الفطر بروز بدھ 10 اپریل کو منائی جائے گی۔

ریاض(خلیج نیوز)ہائیپر لوپ کے ذریعے سعودی عرب اور متحدہ عرب امارات کے کئی بڑے شہروں کے درمیان تیز رفتار رابطے آسان تر ہو گئے اور فاصلے سمٹ کر رہ جانے کی امید پیدا ہو گئی۔ طویل تر سمجھے جانے والے فاصلے بھی محض ایک گھنٹے کے اندر تک طے کرنا ممکن ہو گیا۔ یہ بات دنیا کے سب سے بڑے ٹرانسپورٹ سسٹم کے سربراہ اینڈریس ڈی لیون نے عرب ٹی وی سے گفتگوکے دوران بتائی،ہائیپر لوپ اگلی نسل کے لیے متعارف کرائی گئی ٹیکنالوجی ہے۔ اس کا ہدف بڑے شہروں کو ریکارڈ کم وقت میں باہم جوڑ دینا ہے، ایسی ٹرانسپورٹ کے ساتھ جو ایک گھنٹے میں ایک ہزار کلومیٹر کی رفتار سے فاصلوں کو طے کرتے ہوئے آگے بڑھتی ہے۔ہائیپر لوپ کے سربراہ وہ کہانی سناتے ہیں جو خلیجی ملکوں کے درمیان رو بعمل ہونے جا رہی ہے۔ فاصلوں کو پاٹ دینے کا یہ سلسلہ سعودی عرب اور امارات کے شہروں کے درمیان بھی ممکن بنایا جا رہا ہے۔