راولپنڈی(خلیج نیوز)پاکستان تحریک انصاف کے رہنما اور سابق وفاقی وزیر برائے سمندرپار پاکستانیز ذلفی بخاری کی جائیدادیں ضبط کرنے کیلئے درخواست دائر کردی گئی۔ اسپیشل پراسیکیوٹر قومی احتساب بیورو (نیب)راولپنڈی نے ذلفی بخاری کے خلاف احتساب عدالت میں درخواست دائر کی۔نیب کی درخواست میں موقف اختیار کیا گیاکہ ذلفی بخاری عدالت سے اشتہاری قرار دئیے گئے ہیں۔درخواست میں استدعا کی گئی کہ ذلفی بخاری کی اسلام آباد میں 34کینال اور اٹک میں 1300کنال اراضی ضبط کرنے کا حکم دیا جائے۔

لاہور (خلیج نیوز) پاکستان تحریک انصاف کے 51کارکنوں کی بازیابی کے لیے لاہور ہائیکورٹ میں درخواست دائر کر دی گئی۔درخواست تحریک انصاف کے رہنما یوسف وائیں کی جانب سے دائر کی گئی جس میں موقف اختیار کیا گیا کہ پولیس نے اسلام آباد جاتے ہوئے تمام کارکنوں کو حراست میں لیا،گرفتار افراد کے خلاف کوئی مقدمہ درج نہیں ہیں۔درخواست گزار کا مزید کہنا تھا کہ پی ٹی آئی کے تمام کارکنان پولیس کو کسی مقدمہ میں مطلوب بھی نہیں ہیں، تمام کارکنان کی گرفتاری کو غیر قانونی قرار دیا جائے، استدعا ہے کہ تمام گرفتار کارکنان کو عدالت میں پیش کرنے کا حکم دیا جائے۔

اسلام آباد (خلیج نیوز) بانی پی ٹی آئی عمران خان نے 190 ملین پائونڈ ریفرنس کی کارروائی روکنے کیلئے متفرق درخواست دائر کر دی۔تفصیلات کے مطابق
بانی پی ٹی آئی عمران خان نے 190 ملین پائونڈ ریفرنس کی کارروائی روکنے کیلئے متفرق درخواست دائر کر دی،بیرسٹر سلمان صفدر اور خالد یوسف چوہدری کے توسط سے دائر درخواست میں چیئرمین نیب، ڈی جی نیب اور پراسیکیوٹر جنرل کو فریق بنایا گیا ہے ۔ درخواست میں نیب کے 343ویں ایگزیکٹو بورڈ میٹنگ کے ریکارڈ کی فراہمی کی استدعا کرتے ہوئے کہا ہے کہ اپریل 2020 کی نیب ایگزیکٹو بورڈ کی میٹنگ میں کیس بند کرنے کا فیصلہ کیا گیا تھا۔درخواست میں کہا گیا ہے کہ ٹرائل کورٹ کے 12اگست کا آرڈر اسلام آباد ہائیکورٹ میں چیلنج کیا اور کہا کہ تفتیشی افسر نے بیان دیا کہ نیب کی 343ویں بورڈ میٹنگ میں کیس بند کرنے کی منظوری دی گئی، ٹرائل کورٹ نے ایگزیکٹو بورڈ میٹنگ کا ریکارڈ طلب کرنے کی درخواست مسترد کی تھی۔درخواست میں استدعا کی گئی ہے کہ نیب کی ایگزیکٹو بورڈ میٹنگ کا ریکارڈ پیش نہ کیا گیا تو بانی پی ٹی آئی کے دفاع میں بھاری نقصان ہو گا، تفتیشی افسر نے جرح کے دوران نیب کی 343 ویں بورڈ میٹنگ سے متعلق کچھ باتوں کا اعتراف کیا، ضروری ہے کہ نیب کی 343ویں بورڈ میٹنگ کا ریکارڈ ٹرائل کورٹ کے سامنے رکھا جائے۔