اسلام آباد(خلیج نیوز)وزیراعظم شہباز شریف کے مشیر رانا ثناء اللہ نے کہاہے کہ جت تک پی ٹی آئی 9مئی سے علیحدہ نہیں ہوتی جلسے کی اجازت نہیں ملے گی،فیض حمید معاملے پر عمران خان ملوث ہواتوملٹری ٹرائل کیلئے کسی کی اجازت کی ضرورت نہیں ۔نجی ٹی وی کے پروگرام میں گفتگو کرتے ہوئے رانا ثناء اللہ نے کہا کہ پی ٹی آئی کو 8ستمبر کے جلسے کی اجازت بھی نہیں ملے گی۔انہوںنے کہاکہ جب تک پی ٹی آئی خود کو 9مئی سے علیحدہ نہیں کرتی تب تک انہیں نہیں لگتا کہ انتظامیہ اسے جلسے کی اجازت دے گی۔ایک سوال پر رانا ثناء اللہ نے کہا کہ اگر فیض حمید کے معاملے میں عمران خان کا ملوث ہونا ثابت ہوتا ہے تو عمران خان کے ملٹری ٹرائل کیلئے پنجاب یا وفاقی حکومت، کسی کی اجازت کی ضرورت نہیں ہے۔رانا ثناء اللہ نے کہا کہ آرمی ایکٹ کے تحت انکوائری بورڈ کو اس کی پہلے سے قانونی اجازت ہے۔

اسلام آباد(خلیج نیوز)پاکستان تحریک انصاف کے رہنما شیر افضل مروت نے ترنول جلسے کی موجودہ جگہ کو ناکافی قرار دیا ہے۔اسلام آباد میں جلسے کے معاملے پر شیر افضل مروت نے میڈیا سے گفتگو کی اور کہا کہ جلسے کیلئے موجودہ جگہ ناکافی ہے، سنگجانی تک کسی بھی کھلی جگہ پر جلسہ ہوگا۔انہوں نے کہا کہ جلسہ ہر حال میں ہوگا، ہم پرامن اور نہتے نکلیں گے، ملک بھر سے قافلے جلسے کیلئے (آج)بد ھ کی رات روانہ ہوں گے۔پی ٹی آئی رہنما نے کہا کہ اپوزیشن الائنس کی قیادت بھی جلسے میں موجود ہوگی۔انہوںنے کہاکہ وزیراعلیٰ علی امین گنڈاپور خیبر پختونخوا سے آنے والے قافلے کی قیادت کریں گے۔