پشاور(خلیج نیوز)مشیر اطلاعات خیبرپختونخوا بیرسٹر محمد علی سیف نے کہا ہے کہ کچھ سیاست دان اپنے مفاد کے لئے پورا نظام برباد کردیتے ہیں ، الیکشن ایکٹ میں ترامیم سے آئین کی توہین کی گئی۔سینیٹ ،قومی اسمبلی اور کمیٹیوں سے زبردستی قانون پاس کروایا گیا۔پشاور میں پریس کانفرنس کرتے ہوئے بیرسٹر سیف کا کہنا تھا کہ سپریم کورٹ کے مخصوص نشستوں کے فیصلے کو روکنے کے لئے قانون پاس کیا گیا ، الیکشن ایکٹ میں ترامیم آئین کے متن اور روح کے خلاف ہے ، سابق چیئرمین مشروط معافی اس صورت میں مانگیں گے جب ہمارے خلاف کچھ ثابت ہو جائے۔
انکاکہنا تھا سپریم کورٹ کا فیصلہ روکنے کے لئے قانون بنایا گیا،پی ٹی آئی نے اس عمل کو چیلنج کرلیا ہے، پی ٹی آئی کے ساتھ ایک بار پھر غیرقانونی رویہ اختیار کیا جارہا ہے، پنجاب میں ہمارے ایم این ایز گرفتار کیے جارہے ہیں، ایم این ایز کو اس لئے گرفتار کیا جارہا ہے تاکہ وہ پی ٹی آئی سے اپنا تعلق ظاہر نہ کریں،انکاکہنا تھا کہ وزیراعلی نے دو دن قبل اسٹریٹ کرائمز پر پولیس سے بات کی، خیبرپختونخوا میں جرائم کی شرح دیگر صوبوں سے کم ہے، پولیس نظام میں کمزوریاں ہوتی ہیں، کچھ کوتاہیاں ہیں لیکن یہ حل ہوجائیں گی، سی ٹی ڈی کو 3 ارب روپے سے زیادہ فنڈز جاری کیے، مشیراطلاعات کاکہنا تھا کہ پیرس اولمپکس میں ارشد ندیم کی کامیابی پر پوری قوم کو مبارک باد، پیش کرتے ہیں،ملک کا جمہوری نظام ہر پاکستانوں کو صلاحیتیں اجاگر کرنے کا موقع دیتا ہے۔
