ڈاکٹر عبدالقدیر خان ٹرسٹ اسپتال میں کروڑوں روپے کی منی لانڈرنگ، 2ملزمان گرفتار

اسلام آباد(خلیج نیوز)ڈاکٹر عبدالقدیر خان ٹرسٹ ہسپتال میں کروڑوں روپے کی منی لانڈرنگ پر 2ملزمان کوگرفتارکرلیاگیا۔تفصیلات کے مطابق ڈاکٹر عبدالقدیر خان ٹرسٹ اسپتال میں کروڑوں روپے کی منی لانڈرنگ کا انکشاف ہوا ہے۔فیڈرل انویسٹی گیشن ایجنسی (ایف آئی اے)نے اے کیو خان ہسپتال میں منی لانڈرنگ کیس میں ملزمان سہیل اور شوکت بابر ورک کو گرفتار کرلیا۔ترجمان ایف آئی اے کے مطابق ملزمان پر ڈاکٹر عبدالقدیر خان ٹرسٹ ہسپتال میں کروڑوں کی منی لانڈرنگ کا الزام ہے، ملزمان کے خلاف درخواست ڈاکٹر دینا خان کی جانب سے دی گئی۔ایف آئی اے نے کہاکہ اے کیو خان ٹرسٹ ہسپتال کی جعلی ڈیڈ تیار اور استعمال کرنے پر مقدمہ درج ہوا، ملزمان کے خلاف مقدمہ تھانہ نصیر آباد میں درج ہوا تھا، ملزم سہیل کو مقدمہ درج ہونے کے بعد گرفتار کر لیا گیا تھا۔ ترجمان ایف آئی اے نے بتایا کہ دیگر ملزمان نے اپنی عبوری ضمانت کروالی تھی، ملزمان کے خلاف ایک ایف آئی آر تھانہ راوی روڈ میں بھی درج ہے۔