ملازمین نے زیادہ کام کروانے پر منیجر کی کرائے کے غنڈوں سے پٹائی کروادی، ویڈیو وائرل

ممبئی (خلیج نیوز) بھارت کے شہر بنگلورو میں ایک فرم میں کام کرنیوالے ملازموں نے زیادہ کام کروانیوالے منیجر کو کرائے کے غنڈوں سے سڑک پر ہی پٹوا دیا۔غیر ملکی میڈیا رپورٹ کے مطابق بنگلورو کی ایک سڑک پر بنائی گئی ویڈیو سوشل میڈیا پر وائرل ہورہی ہے جس میں چند افراد کو ایک شخص کو سڑک کے درمیان دن میں بے رحمی سے لوہے کی سلاخ سے مارتے پیٹتے دیکھا جاسکتا ہے۔رپورٹ کے مطابق متاثرہ شخص سریش ایک پرائیویٹ فرم میں گزشتہ ایک سال سے بطور آڈیٹر کام کررہا ہے، سریش مبینہ طور پرفرم کے دو دیگر ملازمین اوماشنکر اور ونیش پر تیزی سے کام کرنے کے لیے دبائو ڈال رہا تھا جس کے بعد شنکر اور ونیش نے آڈیٹر پر حملہ کرنے کیلئے غنڈوں کو پیسے دیئے۔منیجر پر غنڈوں کے حملے کی ویڈیو ریکارڈ کرکے سوشل میڈیا پر وائرل کردی گئی جس کے بعد بنگلورو پولیس نے کارروائی کرتے ہوئے 5 افراد کو گرفتار کرلیا ہے۔